Nasikop ang usa ka giila sa kapulisan nga high-value individual o HVI human makuhaan og 75 gramos nga gituohang shabu nga nagkantidad og kapin P510 mil sa buy-bust operation sa Barangay Silway 8, Polomolok, South Cotabato.
Gihimo ang operasyon pasado alas-11 sa buntag niadtong Oktubre 2, 2026 sa usa ka waiting shed daplin sa National Highway. Nasikop ang suspek nga giila sa alyas nga “Jat-jat,” 30 anyos, walay trabaho ug residente sa Barangay Tambler, General Santos City.
Narekober gikan sa suspek ang unom ka pakete sa gituohang shabu, P1,000 nga buy-bust money, usa ka .357 Magnum nga rebolber nga adunay tulo ka buhing bala, duha ka cellphone, timbangan ug sling bag.
Anaa na sa kustodiya sa Polomolok Municipal Police Station ang suspek, samtang ang mga nakuhang droga ug uban pang ebidensiya gidala alang sa forensic examination ug pag-andam sa tukmang mga kaso.
