Nadakpan ang usa ka lalaki kinsa nangawat ug videoke machine pinaagi sa paspas nga police response didto sa Aurora 6th, brgy. San Jose, Digos City niadtong milabayng adlaw. Ang dinakpan usa ka 30 anyos, ulitawo ug residente sa Mabini Extension, Aquino Road, Barangay San Miguel susamang dakbayan.
Matod pa sa report, nahitabo ang pagpangawat sa suspetsado sa may Purok Santan, Barangay Zone 3, Digos City diin ang Videoke machine gipanag-iyahan ni Nelia Canoy Rentura, 60 anyos. Nakabutang matod pa kini kilid sa iyang tindahan ug namatikdan nga gidagit sa usa sa iyang kustomer. Dali nga mitaho ang tag-iya ngadto sa Digos City Police Station.
Sa pagkahidawat sa maong taho, mipahigayon og operasyon ang kapulisan aron sa paggukod sa suspect diin Dali Ra usab nga nasikop ug narecover lakip ang kinawat nga videoke machine. Gidala ang dinakpan ngadto sa kustudiya sa Digos City Police Station alang na sa tukmang disposisyon.
