Nanguna ang Iligan City sa pagpatuman sa bag-ong Train LOKAL o Localized Opportunities for Knowledge Access and Lifelong Learning program sa TESDA, nga gilauman nga ilunsad sa tibuok nasud karong Nobyembre.
Tumong niini nga hatagan og mas dakong papel ang mga lokal nga pangagamhanan sa pagplano ug paghatod sa mga programa sa skills training, base sa panginahanglan sa ilang komunidad, industriya ug mga oportunidad sa panginabuhian.
Gibutyag ni TESDA Executive Director Secretary Francisco Benitez nga pinaagi sa Train LOKAL, mas mapalambo ang workforce development pinaagi sa direktang pakigtambayayong sa mga LGU, training centers, DepEd ug CHED.
Giila usab ni Benitez ang Iligan tungod sa sayong pagmugna sa Iligan City Technical Education and Skills Development Council niadtong 2024, nga usa sa mga gikinahanglan sa maong programa.
Makatabang ang konseho sa paggiya sa mga programa sa pagbansay aron mas haum sa panginahanglan sa mga estudyante, trabahante ug mga negosyo sa siyudad.
Pinaagi sa Train LOKAL, lauman nga mas mapaduol ang skills training sa mga komunidad aron dili na kinahanglan mobiyahe og layo ang mga gustong makakat-on og bag-ong kahanas, makapangita og trabaho o makasugod og kaugalingong panginabuhian.
