Mag-operate na karong Oktubre 18, 2026 ang bag-ong Iligan Business Development Office sa Makati City, Metro Manila, nga nagtumong sa pagpalapad sa koneksyon sa Iligan City ngadto sa mga negosyante, investors, tourism partners ug mga Iliganon nga nagpuyo ug nagtrabaho sa Metro Manila.
Libre nga gitugyan sa Iliganon sa Manila, Inc. o ISMI ngadto sa Iligan City Local Government Unit ang office space nga nahimutang sa Unit 1712, Tower 1, Cityland 10, Salcedo Corner Valero Street, Barangay Bel-Air, Makati City.
Magsilbi kini isip ISMI Liaison Office sa Iligan City LGU aron mapalig-on ang koordinasyon ug kolaborasyon sa nagkalain-laing programa ug inisyatiba alang sa siyudad.
Pinaagi sa maong opisina, mas mapalapad ang pag-promote sa business investments, turismo ug economic opportunities sa syudad, ilabina ngadto sa mga potensyal nga investors ug business partners sa Metro Manila.
Lauman nga mahimong dugang nga tulay ang opisina aron mas dali nga maipakita ang mga oportunidad sa Iligan ug mapalambo ang lokal nga ekonomiya pinaagi sa mas lig-on nga koneksyon tali sa siyudad, negosyo ug mga Iliganon sa gawas sa lungsod.
Photo courtesy: City Government of Iligan
