Nadakpan ang usa ka 30-anyos nga lalaki atol sa hiniusang buy-bust operation sa kapulisan sa pagpanguna sa Baroy Municipal Police Station, 1st ug 2nd Provincial Mobile Force Companies o PMFC sa Lanao del Norte Police Provincial Office, uban ang 1005th Maneuver Company sa Regional Mobile Force Battalion 10, sa koordinasyon sa Philippine Drug Enforcement Agency o PDEA sa may alas-4:20 sa hapon niadtong Oktubre 5, 2026 sa Purok 5, Barangay Poblacion, Baroy, Lanao del Norte.
Giila ang suspek nga si alyas “Megoy,” 30 anyos, ulitawo ug residente sa maong barangay, nga giila isip Street-Level Individual. Subay sa report, narekober gikan sa nahimutangan sa suspek ang lima ka pakete sa gituohang shabu nga nitimbang sa 0.48 gramos, nga adunay gibanabanang Standard Drug Price o SDP nga 3,264 pesos.
Narekober usab sa mga awtoridad ang usa ka pakete sa New Berlin nga sigarilyo ug 200-pesos nga bill nga gigamit isip buy-bust money. Sa pagkakaron, ang tanang nakumpiska nga drug evidence gidala ngadto sa Lanao del Norte Provincial Forensic Unit alang sa qualitative ug quantitative examination. Samtang ang nadakpang suspek anaa na sa kustodiya sa Baroy MPS alang sa dokumentasyon ug tukmang disposisyon sa kaso.
Photo Courtesy: Lanao del Norte PPO
