Nasakmit sa kapulisan ang mga kontrabandong sigarilyo nga mokabat sa 11 mil pesos ang gibanabanang kantidad atol sa duha ka managlahing anti-smuggling operations sa Zamboanga sibugay niadtong nakalabay nga adlaw.
Gipahigayon sa Diplahan Municipal Police Station ug Alicia Municipal MPS ang operasyon isip kabahin sa gipakusgang kampanya batok sa tanang porma sa smuggling, lakip na ang pag-inspeksyon sa mga establisementong pangnegosyo.
Sumala sa Zamboanga Sibugay Police Provincial Office o ZSBPPO, ang kantidad sa mga nasakmit nga sigarilyo gibase sa presyo sa Bureau of Customs.
Ang tanang nakumpiskar nga mga produkto gidala sa tagsa-tagsa nilang municipal police station alang sa hustong dokumentasyon ug disposisyon, una kini itugyan ngadto sa bureau of customs.
Padayon nga gipakusgan sa ZSBPPO ang anti-smuggling operations aron mapugngan ang pagsulod ug pag-apod-apod sa mga ilegal nga produkto, mapanalipdan ang lokal nga ekonomiya, ug masiguro ang patas nga patigayon sa probinsya.
