Mokabat sa 258 ka mga langyaw ang na-account sa mga awtoridad atol sa managlahing operasyon sa Barangay Tandiong Muslim sa Alicia ug Barangay Kimos sa Siay, Zamboanga Sibugay.
Ang maong operasyon gipahigayon isip kabahin sa enforcement activities batok sa umano’y forced labor ug sa pagtrabaho sa mga langyaw nga walay gikinahanglang visa ug immigration documents.
Sa Alicia, 130 ka mga langyaw ang na-account, diin 120 niini mga Chinese nationals, upat ka Indonesians, tulo ka Malaysians ug tulo ka Myanmar nationals. Gipangulohan ang operasyon sa Bureau of Immigration o BI, uban ang National Bureau of Investigation o NBI, Armed Forces of the Philippines o AFP, PIU-ZSBPPO ug Alicia MPS.
Samtang sa Barangay Kimos sa Siay, 128 ka mga langyaw ang na-account. Kini naglangkob sa 124 ka lalaki, tulo ka babaye ug usa ka bata nga usa pa lamang ka tuig ang edad. Gipangulohan usab sa BI ang operasyon, uban ang NBI ug AFP, samtang ang PIU-ZSBPPO ug Siay MPS maoy naghatag og area security.
Padayon karon ang verification ug imbestigasyon sa BI ug NBI aron matino kung adunay mga paglapas sa immigration laws ug uban pang may kalabotan nga balaod. Padayon usab ang koordinasyon sa mga law enforcement agencies alang sa seguridad ug hustong disposisyon sa mga na-account nga langyaw.
