Sikop sa mga awtoridad ang usa ka lalaki nga gikonsiderar nga Street-Level Individual (SLI) human makuhaan og gidudahang shabu ug armas atol sa gilusad nga anti-illegal drug operation niadtong nakalabay nga adlaw, sa may alas 9:55 sa buntag didto sa Purok 5, Barangay Habag, Lanuza, Surigao del Sur.
Gipahigayon ang maong operasyon pinaagi sa pagsilbi og Search Warrant sa hiniusang pwersa sa Lanuza Municipal Police Station (Lanuza MPS) ug Philippine Drug Enforcement Agency (PDEA) Surigao del Sur.
Narekober gikan sa dinakpan ang tulo ka heat-sealed transparent plastic sachets sa gidudahang shabu nga mitimbang og 1.24 gramos ug nagkantidad og Php 8,432.00 base sa standard drug price. Gawas niini, nakuha usab sa posisyon sa suspek ang usa ka yunit sa Caliber .38 Revolver, duha ka kabhang sa bala, 13 ka buhing bala sa nagkalain-laing kalibre ug drug paraphernalia.
Gipahibalo ang dinakpan sa iyang mga katungod ubos sa konstitusyon ug anaa karon sa kustodiya sa Lanuza MPS alang sa tukmang dokumentasyon ug pagpasaka og kaso.
Photo courtesy: Lanuza MPS
