Nadakpan sa hiniusang operasyon sa kapulisan ug militar ang usa ka 27-anyos nga lalaki nga giila sa alyas “Asyan,” nga giingong medical officer sa Sub-Regional Sentro de Grabidad Southland sa North Eastern Mindanao Regional Committee.
Ang maong suspek residente sa Barangay Anahao Daan, lungsod sa Tago, Surigao del Sur.
Gipahigayon ang operasyon sa mga personahe sa Barobo Municipal Police Station (MPS), kauban ang Philippine Army, 1st Surigao del Sur Provincial Mobile Force Company (PMFC), ug Surigao del Sur Provincial Intelligence Unit 13.
Sumala sa kapulisan, si alyas Asyan giklasipikar isip number five Most Wanted Person (MWP) sa Police Regional Office 13 ug nalakip usab sa Communist Terrorist Group–Periodic Status Report (CTG-PSR).
Gidakop ang suspek pinaagi sa daghang warrant of arrest nga gipagawas sa Regional Trial Court (RTC), Branch 28, Lianga, Surigao del Sur, tungod sa mga kasong murder ug attempted murder.
Nag-atubang siya og usa ka kaso sa murder nga walay girekomendar nga piyansa ug upat ka kaso sa attempted murder, diin matag kaso adunay girekomendar nga piyansa nga 120 mil pesos.
Ang warrant of arrest alang sa kaso sa murder gipagawas niadtong Hunyo 2, 2025, samtang ang mga warrant alang sa attempted murder gipagawas niadtong Agosto 23, 2022, ug Abril 23, 2025.
Human sa iyang pagkadakop, ang suspek ipailalom sa tukmang proseso sa balaod aron maatubang ang mga kasong gipasaka batok kaniya.
Photo courtesy: PRO 13
