Naglunsad og lightning protest ang mga magtutudlo, education workers, ug education students gikan sa Alliance of Concerned Teachers (ACT) Philippines atubangan sa Malacañang, usa ka adlaw sa wala pa ang World Teachers’ Day.
Ang ilang nag-unang panawagan ang pagpasaka sa entry-level nga suholan sa mga magtutudlo ngadto sa P50,000, ang pagpataas sa Personnel Economic Relief Allowance (PERA) ngadto sa P5,000, ug ang paggahin og katumbas sa 6 porsyento sa gross domestic product (GDP) sa nasud alang sa edukasyon aron masulbad ang krisis sa sektor.
Gisaway ni ACT Secretary-General Raymond Basilio ang administrasyong Marcos Jr. tungod sa dugay nang pagbalewala sa mga makatarunganong gipangayo sa mga magtutudlo ug pagpabiling kulang sa pondo alang sa mga pasilidad ug serbisyo taliwala sa mga alegasyon sa korapsyon.
Gihagit niya ang Pangulo nga pamatud-an ang pagtahod sa mga mamumuo pinaagi sa seryosong aksyon ug dili lang sa mga pulong, samtang gipasabot nga duna pay igo nga pondo ang kagamhanan kon tarongon lang pagdumala ang buwis ug kaban sa bayan.
Naglanog-lanog ang panawagan nila nga dugang sweldo, inay dugang trabaho.
Photo courtesy: Jonathan Cellona
