Gihimo sa City Inter-Agency Committee Against Trafficking and Violence Against Women and Children kon CIACAT-VAWC ang usa ka city-wide reach-out operation ug inspeksyon sa mga lodging houses, hotels, massage spas, ug mga bar niadtong Sabado, Oktubre 3, isip pagsaulog sa ‘International Day of No Prostitution’.
Atol sa inspeksyon, ang Regulatory Compliance Board kon RCB nag-isyu og Official Violation Receipt sa duha ka transient inns ug usa ka internet cafe tungod sa nagkalain-laing kalapasan. Samtang duha ka menor de edad usab ang naluwas ug gidala sa Oro Response and Processing Center sa CSWD aron mahatagan sa saksyon ug pag-atiman.
Gipangunahan sa CIACAT-VAWC, RCB, CSWD, Cagayan de Oro City Police Office, ug Streetlight Foundation ang operasyon aron palig-onon ang kampanya sa siyudad batok sa prostitusyon ug pagpanalipod sa mga kabataan ug kababayen-an.
Photo courtesy: Cagayan de Oro City Information Office
