Narekord ang “Good” o maayo nga kalidad sa hangin sa Tagum City base sa pinakabag-ong datos sa ambient air monitoring stations sa Environmental Management Bureau (EMB) Davao Region niadtong nakalabay nga adlaw alas-7:00 sa buntag Base sa Particulate Matter 2.5 measurement, adunay Air Quality Index (AQI) nga 38.75 ang Tagum monitoring station, nga nagpasabot nga maayo ug acceptable pa ang kasamtangang kalidad sa hangin alang sa kadaghanan sa publiko.
Apan, nagpadayon ang monitoring sa EMB tungod sa posibilidad nga makaapekto sa Mindanao ang transboundary smoke o aso nga gikan sa mga sunog sa kalasangan sa South Papua ug Kalimantan, Indonesia. Sumala sa Copernicus Fire Emission Watch, ang kasamtangang direksyon sa hangin mahimong magdala sa aso paingon sa Mindanao, nga posibleng hinungdan sa pagtaas sa lebel sa Particulate Matter 2.5, pagporma og haze, ug pagkunhod sa visibility sa pipila ka lugar sa Davao Region.
Gipasabot usab nga ang gidugayon ug kakusog sa epekto magdepende sa direksyon sa hangin, pagkatag sa aso sa atmospera, pag-ulan, ug sa padayong kalihukan sa mga sunog sa Indonesia. Sa pagkakaron, acceptable pa ang kalidad sa hangin sa tanang monitoring stations ug wala pa kini nagpakita og risgo sa panglawas sa kadaghanan sa publiko.
Gidasig ang publiko nga magpabiling alerto sa mga sunod nga air quality advisories ug magpadayon sa mga pamaagi nga makatabang sa pagpanalipod sa kalidad sa hangin ug kalikupan.
Photo Courtesy: CDRRMO Tagum
