Nadakpan sa kapulisan ang usa ka 45-anyos nga lalaki nga giila isip High-Value Individual (HVI) sa lungsod sa Barobo, Surigao del Sur, atol sa pagpatuman sa search warrant batok sa iligal nga droga.
Gipahigayon ang operasyon sa Purok 6, Barangay Poblacion, Barobo, alas-12:40 sa kadlawon hangtod alas-3:50 sa buntag niadtong nakalabay nga adlaw, sa mga personnel sa Barobo Municipal Police Station (MPS), uban sa RIU13 ug PIT-SDS.
Nakuha sa kapulisan ang walo ka heat-sealed sachet nga gituohang adunay shabu, nga adunay gibug-aton nga 6.58 gramos ug gibanabanang kantidad nga ₱44,744.
Narekober usab ang lima ka sachet nga adunay mga timailhan sa gituohang shabu ug nagkalain-laing drug paraphernalia, lakip ang weighing scale ug mga gamit nga giingong gigamit sa paggamit sa ilegal nga droga.
Ang operasyon gihimo ubos sa Search Warrant Nos. 19-2026 ug 20-2026 ug ang pagpangita, pagsakmit ug pag-inventory sa mga ebidensya gihimo atubangan sa mga gikinahanglang saksi.
Gipahibalo sa kapulisan ang nadakpan sa iyang mga katungod ubos sa Konstitusyon. Gidala siya kauban ang mga nakumpiskang ebidensya ngadto sa Barobo MPS alang sa hustong dokumentasyon ug legal nga proseso.
Photo courtesy: Barobo MPS
