Mokabat na sa 2,018 ka kaso sa dengue ang natala sa tibuok probinsya sa Agusan del Sur, diin 14 na ang namatay, base sa datos sa Provincial Health Office (PHO) hangtod Oktubre 1, 2026.
Base sa talaan, ang mga lungsod ug syudad nga adunay pinakataas nga ihap sa kaso sumala sa populasyon mao ang Rosario, San Francisco, Bayugan City, Loreto ug Bunawan.
Gipakita usab sa datos nga ang mga kabatan-onan nga nag-edad og 10 hangtod 14 anyos ang pinakadaghan nga nataptan sa maong sakit, nga mikabat sa 17.69 porsyento sa kinatibuk-ang kaso. Samtang 16 anyos ang kasagarang edad sa mga nataptan.
Sa kinatibuk-ang kaso, 1,531 ka pasyente o 74 porsyento ang na-admit sa mga ospital, samtang 26 porsyento ang wala maospital. Sa 14 ka namatay, walo ang lalaki ug unom ang babaye. Ang ilang edad naglangkob gikan sa 4 hangtod 52 anyos.
Ang Bayugan City ang adunay pinakadaghan nga namatay sa dengue nga mikabat sa lima, gisundan sa Rosario nga adunay upat, Loreto nga duha, samtang tag-usa ang natala sa Bunawan, San Francisco ug Trento.
Gipahinumdoman ang publiko nga magpabiling mabinantayon ug maghimo sa gikinahanglang mga lakang aron malikayan ang dengue, ilabina ang paglimpyo sa palibot ug pagwagtang sa mga lugar nga mahimong maitlogan sa mga lamok.
