Misaka sa 11 porsyento ang bank lending sa Pilipinas niadtong Agosto 2026, nga pinakapaspas nga pagtubo sulod sa tulo ka bulan, samtang mipadayon ang paghulam sa mga negosyo. Base sa preliminary data sa Bangko Sentral ng Pilipinas, miabot sa ₱15.12 trilyon ang total outstanding loans sa universal ug commercial banks, mas taas kumpara sa 10.4 porsyentong pagtubo niadtong Hulyo.
Ang business loans misaka usab og 10.6 porsyento kumpara sa samang panahon niaging tuig. Lakip sa mga sektor nga nakadawat og mas dagkong pautang ang real estate, electricity, gas ug air-conditioning, wholesale ug retail trade, manufacturing, information and communication, ug transportation ug storage.
Samtang, mas hinay ang pagtubo sa consumer loans nga mikabat sa 16.2 porsyento gikan sa 17.1 porsyento niadtong Hulyo. Sumala sa BSP nga ang pagtaas sa bank lending nagpakita sa padayong panginahanglan sa credit, ilabina gikan sa mga negosyo, samtang padayon usab nilang ginamonitor ang lending ug liquidity aron mapadayon ang price ug financial stability.
Photo courtesy: World Bank
