Patay ang usa ka 30-anyos nga lalaki human gipusil ug gidunggab sa usa ka 38-anyos nga lalaki didto sa Purok 2, Barangay Kipaypayon, Quezon, Bukidnon, alas-5:50 sa hapon niadtong nakalabay nga adlaw.
Base sa imbestigasyon sa kapulisan, aduna na silay daang panagbikil sa biktima diin gigukod matud pa sa biktima ang suspek gamit ang hinagiban niadtong miaging bulan, samtang mireport usab ang suspek sa pulis niadtong Setyembre 30 kay giluba ug gikulata kini sa igsoon sa biktima.
Niadtong Oktubre 1, miadto ang biktima sa balay sa suspek nga hubog ug nanghagit og away, rason nga misulod ang suspek aron pagkuha og armas.
Matud sa suspek, gipusil niya ang biktima og unom ka beses isip self-defense, ug sa dihang natumba na kini, gikuha sa suspek ang dala nga hinagiban sa biktima ug giluba kini sa liog.
Gidala pa sa ospital ang biktima apan gideklarar nga dead on arrival sa nag-atiman nga Doktor. Narekober sa kapulisan ang usa ka Cobravo Ingram gun, steel magazine, mga basiyo sa bala, ug bladed weapon.
Sa karon giandam na ang kaso batok sa suspek kinsa nakakostudiya sa Quezon MPS kinsa misurender sa Punong Barangay ug mga tanod human sa maong insidente.
Photo courtesy: Quezon MPS
