Nakit-an ang mga bukog ug kalabera sa usa ka 24-anyos nga lalaki nga kapin usa ka bulan nang gikatahong missing didto sa usa ka sapa sa Sitio Calacapan, Barangay Mandahican, Cabanglasan, Bukidnon niadtong nakalabay nga adlaw.
Giila ang biktima nga si Pedro Baringay Lindaban Jr., residente sa Purok 1-A sa maong barangay, kinsa kataposang nakita niadtong Agosto 8, 2026.
Nidangop sa kapulisan ang kabanay sa biktima nga si Ronalyn Amba human makadawat og mensahe sa Messenger gikan sa usa ka alyas “Listay” bahin sa maong mga bukog. Pag-abot sa mga awtoridad sa dapit, ilang nakit-an ang nagkatag nga mga bukog sa tawo kauban ang gisi-gisi nga mga sinina. Positibo usab nga giila sa amahan ug magulang nga babaye nga iya kadto sa biktima.
Padayon pa karon ang gihimong imbestigasyon sa Cabanglasan Municipal Police Station aron masayran ang tinuod nga hinungdan sa iyang kamatayon. Gipailalom na usab ang mga bukog sa forensic examination aron makatabang sa pagpalambo sa maong kaso.
Photo courtesy: Cabanglasan Municipal Police Station
