Gipahinumdoman ni DTI Bukidnon Provincial Director Famela Racquel Villanueva ang mga konsumidor nga mahimong mas mabinantayon ug maalamon sa pagpili ug pagpalit sa mga produkto, ilabina sa pagsiguro nga luwas, kalidad ug angay gamiton ang ilang mga gipamalit.
Kabahin kini sa pagsaulog sa Consumer Welfare Month karong Oktubre ubos sa tema nga “Safe Products, Confident Consumers.” Matud niya, importante nga nahibalo ang matag konsumidor sa ilang mga katungod ug responsibilidad aron malikayan ang mga produkto nga mahimong adunay peligro sa panglawas, panimalay ug seguridad.
Gidasig usab ang publiko nga susihon pag-ayo ang mga produkto sa dili pa kini paliton ug mangita og hustong impormasyon aron masiguro nga luwas ug kasaligan ang ilang mapalit.
Gidapit usab ni Villanueva ang mga konsumidor sa Bukidnon nga makig-uban sa DTI sa pagsaulog sa Consumer Welfare Month ug gamiton ang kahibalo bahin sa consumer rights sa ilang adlaw-adlaw nga pagpamalit. Pinaagi sa pagkahibalo sa ilang mga katungod ug responsibilidad, mas makahimo ang mga konsumidor og husto nga desisyon ug mas mapanalipdan ang ilang kaugalingon ug pamilya batok sa mga produkto nga dili luwas.
Photo courtesy: DTI -Bukidnon
