Gikatakda sa Bukidnon Provincial Youth Development Division ang pagpahigayon sa Mandatory Training of Trainers alang sa mga Local Government Officers ug mga opisyal sa Sangguniang Kabataan o SK, didto sa kaulohang Manila gikan Oktubre 4 hangtod 6, 2026.
Sumala kang Acting Provincial Youth Development Division Officer Alejandro Dano Jr., sa pakighinabi sa Juander Radyo Malaybalay nga mandatory ang maong training ug gitumong kini aron ma-update ug ma-refresh ang kahibalo sa mga partisipante kabahin sa ilang mga katungdanan ug responsibilidad. Lakip sa mga hisgutan sa training ang mga bag-ong module ug mga topic nga may kalabotan sa pagdumala sa Sangguniang Kabataan.
Matud ni Dano, importante usab ang pag-refresh sa basic functions sa mga SK officials, ilabina sa SK Chairman ug mga miyembro sa Sangguniang Kabataan, ingon man sa SK Secretary ug Treasurer, aron mas masabtan nila ang hustong pagpatuman sa ilang mga buluhaton sa barangay
Gipunting usab sa opisyal nga may kalabotan kini sa pagpalawig sa termino sa kasamtangang mga SK officials hangtod sa 2028. Pinaagi sa maong refresher training, gilauman nga mapalig-on ang kahibalo sa mga SK officials sa ilang mga mandato ug responsibilidad, ug mas maandam sila sa pagpadayon sa pagserbisyo ug pagpatuman sa mga programa alang sa kabatan-onan sa ilang tagsa-tagsa ka barangay.
Photo courtesy: LGU/PYDO – Bukidnon
