Dili lang kutob sa slaughterhouse ang pag-inspeksyon sa karne aron masiguro ang kaluwasan niini. Padayon usab ang meat inspection ug regulatory monitoring sa National Meat Inspection Service o NMIS Caraga, alang sa mga Meat Cutting Plants ug Meat Distribution Centers aron masiguro nga husto ang pagdumala sa mga produktong karne.
Gitan-aw usab ang pagdawat sa karne, pagphiwa, pagdumala, pagtipig, pagputos, hangtod sa katapusang pag-apod-apod niini ngadto sa mga konsumante.
Tumong niini nga mapadayon ang kalidad ug kaluwasan sa karne, malikayan ang kontaminasyon, ug masiguro nga kini nahiuyon sa gitakdang food safety standards.
Gipahinumdoman usab ang mga nagdumala sa meat establishments nga ang food safety dili usa lamang ka inspeksyon nga himuon sa usa ka higayon.
Kini usa ka padayon nga responsibilidad aron masiguro nga ang matag produktong karne nga moabot sa lamesa sa mga konsumante luwas, limpyo ug angay kan-on.
