Patay ang usa ka 44-anyos nga mag-uuma nga giilang si alyas “Mark,” 44 anyos, residente sa San isidro, leyte human gitigbas sa iyang kainom ug kauban sa trabaho nga giilang si alyas “vince”, 65 anyos diin nahitabo ang insidente didto sa Sitio Bugnay, Barangay Basud, San Isidro, Leyte, alas-1:50 niadtong nakalabay nga adlaw.
Base sa inisyal nga imbestigasyon sa kapulisan, nag-inom ang duha samtang naghimo og uling, sa wala pa sila nagkaangin ug panaglalis tungod sa dili pagkasinabtanay.
Sa taliwala sa ilang panaglalis, gikuha sa suspek ang iyang bolo ug gitigbas ang biktima, nga maoy hinungdan sa iyang hinanaling kamatayon. Boluntaryong misurender ang suspek sa San Isidro Municipal Police Station (MPS) alas-2:20 sa kaadlawon ug siya mismo ang misugilon sa mga pulis bahin sa nahitabo.
Gidala sa San Isidro Rescue ang lawas sa biktima ngadto sa San Isidro Rural Health Unit (RHU) alang sa post-mortem examination. Padayon pa ang imbestigasyon sa kapulisan ug giandam na ang mga dokumento alang sa tukmang kaso nga ipasaka batok sa suspek.
Photo courtesy: RIPO
