Nakasakmit og pito (7) ka armas ang Leyte Police Provincial Office (LPPO) pinaagi sa padayong implementasyon sa Kontra Boga campaign batok sa mga loose ug unauthorized firearms sa nagkalain-laing lugar sa Leyte niadtong Oktubre 1, 2026.
Sa Inopacan ug Mahaplag, usa ka homemade firearm nga lokal nga gitawag og “Latong” ang boluntaryong gitugyan sa tagsa-tagsa ka Municipal Police Station (MPS). Nakadawat usab ang Mayorga MPS og usa ka improvised shotgun, samtang ang Baybay City Police Station, Carigara MPS ug Merida MPS matag-usa ka caliber .38 firearm. Sa San Miguel MPS, usa ka Magnum .357 firearm ang gitugyan. Ang tanang pito ka armas gibutang ubos sa kustodiya sa kapulisan alang sa dokumentasyon, pagtipig, beripikasyon ug tukmang disposisyon subay sa mga kasamtangang polisiya ug pamaagi.
Sumala sa LPPO, kabahin kini sa padayong Kontra Boga ug community-based initiatives aron awhagon ang mga lumulupyo nga boluntaryong motugyan sa ilang loose ug unauthorized firearms ngadto sa mga otoridad. Tumong niini nga mapugngan ang posibleng paggamit sa mga armas sa krimen ug makatampo sa pagpalig-on sa seguridad ug kalinaw sa mga komunidad sa Leyte.
Photo courtesy:PNP LPPO
