Narekober sa kapulisan ang usa ka .45 caliber nga pistola, upat ka magazine ug napulo ka bala gikan sa usa ka menor de edad nga estudyante sulod sa usa ka eskwelahan sa Barangay Dalakit, Catarman, Northern Samar niadtong Oktubre 1, 2026.
Base sa report sa Police Regional Office 8 (PRO-8), nasayran ang insidente human usa ka estudyante ang mipahibalo sa iyang magtutudlo nga adunay gidala nga armas ang menor de edad sulod sa classroom. Gipahibalo dayon sa magtutudlo ang administrasyon sa eskwelahan, nga misumbong sa Catarman Municipal Police Station (MPS).
Narekober gikan sa menor de edad ang .45 caliber nga pistola nga walay serial number, upat ka magazine ug napulo ka bala. Matod sa menor de edad, iya kining amahan.
Giatiman ang menor de edad sa mga personnel sa Women and Children Protection Desk (WCPD) ug girefer ngadto sa Municipal Social Welfare and Development Office (MSWDO) alang sa assessment ug tukmang intervention, subay sa balaod ug mga pamaagi nga gipatuman sa mga kaso nga nalambigit ang menor de edad.
Human sa insidente, nakigkoordinar ang kapulisan sa mga opisyal sa eskwelahan aron mapalig-on ang mga lakang sa kaluwasan ug seguridad ug malikayan ang susamang insidente.
Gipahinumdoman sa PRO-8 ang mga ginikanan ug tigbantay sa mga bata nga siguruhong luwas ug husto ang pagtipig sa mga armas ug dili kini maabot sa mga bata o ubang dili awtorisadong tawo.
Gidasig usab ang mga eskwelahan ug komunidad nga ireport dayon sa mga awtoridad ang bisan unsang insidente nga may kalabotan sa armas aron masiguro ang tukmang aksyon ug kaluwasan sa mga estudyante, magtutudlo ug kawani.
Photo courtesy: PRO-8
