Nagpulong ang City Disaster Risk Reduction and Management Office o CDRRMO uban sa nagkalain-laing concerned government agencies ug partner organizations alang sa pagrepaso ug pag-update sa El Niño Action Plan sa Dakbayan sa Ormoc diin gipahigayon ang Special Council Meeting didto sa DepEd Ormoc Multipurpose Hall, kagahapong adlawa.
Gihisgutan sa maong panagtigom ang kasamtangang sitwasyon, mga interbensyon nga gipatuman, ug mga lakang sa pagpangandam batok sa posibleng epekto sa El Niño.
Gihatagan og pagtagad sa tigom ang mga isyu nga may kalabotan sa agrikultura, suplay sa tubig, panglawas, kalikupan, fire safety, ug power services.
Gipresentar usab ang mga lakang alang sa mga apektadong mag-uuma, water conservation ug pipeline rehabilitation, environmental measures, health preparedness, ingon man ang mga response strategy alang sa posibleng sunog ug power-related concerns.
Gipaambit ni OIC-CAD Dante Albarico ang mga update sa kahimtang sa agricultural sector, lakip ang mga mag-uuma nga apektado sa El Niño. Samtang gipresentar nila OIC Alona Viacrusis ug Raquel Buzon sa ORWASA ang ilang El Niño Management Plan.
Naglatid usab sa ilang tagsa-tagsa ka inisyatibo, preparedness measures, ug response plans ang ENRO nga girepresentahan ni Hanzel Fredericos, City Health Department, BFP-Ormoc, ug LEYECO.
Mitambong sa maong tigom sila Dr. Gregorio Yrastorza, Executive-Legislative Liaison Officer; Dr. Edmund B. Kierulf, Chairperson sa Committee on Disaster Risk Reduction and Management and Climate Change Mitigation; Ciriaco E. Tolibao II, CDRRM Officer; ug mga representante gikan sa nagkalain-laing concerned government agencies ug partner organizations.
Pinaagi sa maong panagtigom, gipalig-on ang koordinasyon sa mga ahensya ug sektor aron mapauswag ang pagpangandam ug response measures sa siyudad batok sa posibleng epekto sa El Niño.
Photo courtesy: City Government of Ormoc
