Nahimong hinungdan sa panaglalis ang panukot sa utang nga misangpot sa pagdunggab sa usa ka lalaki sa Sitio Santol, Barangay P.I., Naval, Biliran, alas-7:35 sa gabii niadtong Oktubre 2, 2026. Ang biktima giila nga si alyas “Peps,” 50 anyos, usa ka mag-uuma ug residente sa Naval, Biliran. Ang suspek giila usab nga si alyas “Victor,” 73 anyos, usa ka caretaker ug residente sa Atipolo, Naval, Biliran.
Base sa inisyal nga imbestigasyon sa mga otoridad, miadto sa maong lugar ang asawa sa suspek aron manukot sa wala pa mabayri nga utang sa biktima, nga misangpot sa dili pagkasinabtanay tali kanila. Gisulti sa asawa sa suspek ang nahitabo ngadto kaniya, hinungdan nga miadto usab ang suspek sa maong lugar uban sa iyang anak nga lalaki. Didto, giingong gidunggab sa suspek ang biktima sa makadaghang higayon gamit ang kutsilyo.
Gidala dayon ang biktima sa Biliran Provincial Hospital alang sa medikal nga pagtambal, samtang nadakpan ang suspek pinaagi sa hot pursuit operation sa kapulisan. Nakuha usab sa mga otoridad ang kutsilyo nga giingong gigamit sa insidente. Ang suspek ug ang maong armas gidala sa Naval Municipal Police Station (MPS) alang sa tukmang disposisyon ug dugang nga imbestigasyon.
