Misulod sa Baybay City Port niadtong nakalabay nga adlaw ang BFAR MCS 3005, usa ka barko sa Bureau of Fisheries and Aquatic Resources (BFAR), nga sakay ang mga personnel gikan sa Philippine Coast Guard (PCG) ug BFAR, isip kabahin sa ilang padayong Monitoring, Control and Surveillance (MCS) operations sa Eastern Visayas.
Tumong sa operasyon ang pagpalig-on sa pagpatuman sa mga balaod sa pangisdaan ug pagtabang sa pagpugong sa ilegal, wala ma-report ug dili kontroladong pagpangisda o Illegal, Unreported and Unregulated (IUU) Fishing. Atol sa ilang pagpabilin sa pantalan, nagpuno usab og mga suplay ang barko sa wala pa mopadayon sa operasyon sa kadagatan sa Camotes ug sa ubang mga katubigan sa Region VIII.
Gipahigayon usab ang Open Ship activity diin gitugotan ang mga bisita, lakip ang mga estudyante gikan sa nagkalain-laing eskwelahan sa Baybay City, nga makasulod ug makasuroy sa barko. Nakaila sila sa mga tripulante sa PCG ug BFAR ug nakasaksi mismo kung giunsa pagmonitor ug pagpanalipod ang kadagatan. Gipasalamatan usab ang Coast Guard Sub-Station Baybay, BFAR ug Baybay City Port Management sa ilang kooperasyon aron mahimong malampuson ang pagbisita sa barko.
Photo courtesy: lihokBaybay
