Boluntaryong misurender sa mga awtoridad ang usa ka indibidwal giila lamang sa alyas nga “Dodoy,” 53 anyos, minyo, panday ug residente sa Barangay Minuhang, Barugo, Leyte nga giila usab isip usa ka drug personality didto sa Poblacion District III, Barugo, Leyte niadtong nakalabay nga adlaw atol sa pagpadayon sa kampanya batok sa ilegal nga droga sa maong lungsod.
Ang maong indibidwal mismo ang mitungha sa Barugo Municipal Police Station (MPS) ug misumiter sa iyang kaugalingon sa kapulisan nga walay paggamit og pwersa, pagpanghadlok o pagpamugos. Ang maong kalihokan gipadali sa Barugo MPS ubos sa pagpangulo ni PMAJ Romeo Q. Sudario Jr., Acting Chief of Police, ubos sa pagdumala ni PCOL Celerino M. Sacro Jr., Provincial Director sa Leyte Police Provincial Office (LPPO).
Sumala sa kapulisan, ang desisyon sa maong indibidwal sa pagbalik-loob, boluntaryo ug tungod sa iyang tinguha nga magbag-o samtang nagpadayon ang kampanya batok sa ilegal nga droga sa Barugo.
Human sa pagsurender, gipailalom siya sa gikinahanglang dokumentasyon ug proseso ug mipirma sa Affidavit of Undertaking isip kabahin sa pormal nga pagproseso sa iyang boluntaryong pagsurender.
Photo courtesy: PNP LPPO
