Hulog sa kamot sa tinugyanan sa balaod ang 45 anyos nga kanhi napriso, drayber ug residente sa Purok 4, Barangay Sta. Cruz, Placer, Surigao del Norte atol sa gikasang drug buy-bust sa operatiba sa Surigao del Norte Police Provincial Office Drug Enforcement Unit o PDEU.
Giila ni Provincial Director PCOL Warren E. Dablo ang suspetsado sa alyas “Tata,” notado nga high-value drug suspect diin nadakpan kini sa Purok Narra, Barangay Quezon, ning dakbayan.
Narekober gikan sa suspetsado ang 11 ka heat-sealed transparent sachet nga adunay gituohang shabu, nga motimbang og 55.5 gramos ug mokabat sa ₱377,400 drug price.
Lakip usab sa nakumpiska ang usa ka P1,000 bill, itom nga sling bag, sunglasses pouch, transparent cellophane, usa ka 1911 Carry .40-caliber pistol, duha ka .40-caliber magazine, 13 ka bala, yawe sa puti nga Suzuki Multicab nga may plakang KBG 4011.
Pasakaan ang suspek sa kasong paglapas sa Republic Act 9165 o Comprehensive Dangerous Drugs Act of 2002. Nasayran usab nga kaniadto nadakpan ang suspek sa Placer niadtong 2016 tungod sa kasong droga, ug gibuhian niadtong 2020.
