Naggahin ang gobyerno og P1 bilyon ngadto sa University of the Philippines (UP) System aron palig-onon ang Project NOAH ug makatabang sa mas sayong pag-ila sa peligro sa baha ug uban pang kalamidad. Sumala ni Presidential Communications Office (PCO) Undersecretary ug Palace Press Officer Claire Castro, gimandoan ni Pangulong Ferdinand Marcos Jr. ang Department of Budget and Management (DBM) nga ipagawas ang pondo alang sa pagpalig-on sa proyekto gamit ang artificial intelligence o AI, real-time hazard monitoring, ug flood forecasting.
Sa kinatibuk-ang pondo, P935 milyon ang igahin alang sa research services, samtang P65 milyon alang sa project management ug administration. Gamiton usab kini sa pagpalit sa gikinahanglang kagamitan, teknolohiya ug serbisyo sa mga eksperto. Pinaagi sa AI-enhanced modeling, LiDAR (Light Detection and Ranging) mapping ug data analytics, ang Project NOAH makahatag og real-time nga impormasyon ug prediksyon bahin sa posibleng pagbaha ug uban pang peligro.
Gilauman nga makatabang ang proyekto sa mga ahensya sa nasudnong gobyerno ug mga lokal nga panggamhanan aron mas paspas ug mas hapsay silang makahimo og desisyon, ilabi na sa wala pa moabot o mograbe ang mga kalamidad. Tumong usab niini nga mapalig-on ang disaster preparedness ug prevention, imbes nga magsalig lamang sa pagresponde kung nahitabo na ang usa ka kalamidad.
Photo courtesy: Esquire Philippines
