Wala pa makumpirma sa Cagayan de Oro Water District o COWD kung kanus-a mabalik sa normal ang agas sa tubig sa Sitio Bolao ug Balaos sa Barangay Iponan, Cagayan de Oro City.
Matud ni Engineer Kim Ferido, Planning and Design Division Manager sa Engineering Department sa COWD, adunay problema sa planta sa South Balibago nga gasupply sa lugar nga hinungdan sa kakulang o pagkawala sa water delivery/services sa ubang bahin sa nasangpit nga barangay.
Dugang ni Engineer Ferido, adunay temporaryong suplay sa tubig sa mga apektadong lugar, apan dili 24 oras ang agas. Gipadayon karong gihulat sa COWD ang pag-kaaayo sa problema sa planta sa South Balibago ug gilauman nga masulbad kini sa labing dali nga panahon aron mabalik sa normal ang serbisyo sa tubig sa mga apektadong konsumidor.
kalambigitan niini nga balita, padayon ang pag-follow up sa Barangay Council sa Iponan ngadto sa Cagayan de Oro City Water District o COWD aron masulbad ang problema sa supply sa tubig sa ilang barangay.
Gikaingon ni Kapitan Benjie Reyes, Punong Barangay sa Iponan, nga niadtong miaging semana nagkasinabot ug naghisgot ang mga representante sa COWD ug mga stakeholders sa Iponan kabahin sa kahimtang sa water supply.
Matud ni Kapitan Reyes, mipasalig ang COWD nga mobalik sa normal ang suplay sa tubig, ug positibo sila nga matuman kini. Gipasiugda usab sa kapitan nga dili matulog ang Barangay Council ug padayon silang nangita og mga paagi aron matabangan ang mga residente nga apektado sa problema sa tubig.
Matud pa niya, importante ang padayon nga koordinasyon tali sa barangay ug COWD aron masiguro nga mabalik ang normal ug masaligan nga suplay sa tubig sa Iponan.
Photo courtesy:PNA
