Pormal nga gipahigayon karong adlawa Agosto 29, 2026 ang Durian Culinary Olympics 2026 pinaagi sa Chef’s Parade, diin madasigong miapil ang mga student-chef gikan sa nagkalain-laing tulunghaan sulod ug gawas sa Tagum City.
Gikan sa Trade City Trade and Cultural Center, mipadayon ang parada paingon sa Tagum City Trade and Exhibition Center sa Rotary Park, diin magpadayon ang nagkalain-laing culinary competitions hangtod Agosto 30, 2026.
Lakip sa mga kalihokan ang Durian Triumph, diin gipangita ang pinakabug-at, pinakatam-is ug pinakamalaman nga durian isip pag-ila sa kalidad sa lokal nga durian sa siyudad.
Magkompetensya usab ang mga student-chef sa lain-laing kategorya sa culinary competition aron ipakita ang ilang kahanas sa paghimo og mga putahe, dessert ug drinks nga durian ang bida nga flavor.
