Patay ang usa ka 68-anyos nga lalaki nga mag-uuma human gitigbas sa wala mailhing suspetsado sa Barangay Dimalinao, Tambulig, Zamboanga del Sur, mga alas-9:52 sa gabii niadtong Agosto 28.
Sumala sa inisyal nga imbestigasyon sa kapulisan, pauli na ang biktima gikan sa usa ka tindahan sa maong lugar dihang giatangan siya sa wala mailhing lalaki ug gitigbas gamit ang sundang.
Nakaplagan na lang biktima nga naghigda na ug wala nay kinabuhi, samtang namatikdan usab nga adunay mga samad tinigbasan sa liog ug uban pang bahin sa lawas.
Sa maong higayon, gikaingon nga kauban sa biktima ang iyang tulo ka tuig nga apo apan wala niini mailhi ang suspetsado tungod sa kangitngit sa lugar.
Padayon pa karon ang follow-up operations sa Tambulig Municipal Police Station aron mailhan ug madakpan ang suspetsado, samtang nagpadayon ang imbestigasyon sa maong insidente.
Photo Courtesy:ZSPPO-PIO
