Ipahigayon karong adlawa, Agosto 29, ang unang Halad sa Pagtuo 2026 sa Sugbo isip bag-ong selebrasyon nga nagtumong sa panaghiusa sa relihiyon, kultura ug tradisyon sa mga lungsod ug dakbayan sa probinsya sa Sugbo.
Ipasundayag sa maong kalihokan ang pito ka festival gikan sa nagkalain-laing bahin sa Sugbo, lakip ang Sinulog sa Carmen, Tuba Festival sa Borbon, Bisnok Festival sa Dumanjug, La Torta Festival sa Argao, Hinulawan Festival sa Toledo City, Dagitab Festival sa Naga City ug Kabkaban Festival sa Carcar City.
Tumong sa selebrasyon ang pagtuo ug pagpasalamat imbis kompetisyon, diin ipakita sa mga partisipante ang ilang lokal nga tradisyon, kasaysayan, kultura ug debosyon pinaagi sa musika, sayaw ug mga presentasyon.
Gilauman usab nga magsugod ang kalihokan pinaagi sa usa ka religious procession nga adunay 50 ka carrozas nga magdala sa patron saints sa mga lungsod ug dakbayan nga moapil, sundan sa Holy Mass ug mga festival presentations.
Sumala sa mga nangulo sa maong kalihukan nga ang Halad sa Pagtuo dili ipahigayon isip kompetisyon, kundili isip paagi sa pagdala sa tradisyon sa mga town fiesta ngadto sa dakbayan ug paghatag og kahigayonan sa mga Sugboanon nga masinati ang ilang relihiyoso ug kultural nga panulondon.
Gibanabanang mokabat sa P18 milyon hangtod P19 milyon ang kinatibuk-ang gasto sa selebrasyon, nga mas ubos kon itandi sa kapin P200 milyon nga gigasto kaniadto alang sa Pasigarbo sa Sugbo.
Gipaabot nga daghang Sugboanon ug mga bisita ang motambong sa maong unang selebrasyon samtang gidasig ang publiko nga masaksihan ang paghiusa sa pito ka festival nga nagrepresentar sa nagkalain-laing kultura ug tradisyon sa Sugbo.
Photo courtesy: Cebu Provincial Tourism Office
