Gipahinumdom sa Bureau of Fire Protection o BFP-Carmen ang publiko nga mas paspas ug mas epektibo ang pagtawag sa ilang hotline kung adunay sunog o uban pang emerhensiya, inay nga mag post ug Facebook Live sa social media.
Matod ni FO3 Kevin Karl Vallejos, imbestigador sa BFP-Carmen, dili pirming nag-monitor sa social media ang mga personnel alang sa mga insidente sama sa sunog. Aduna silang duty guard nga naka-standby aron modawat sa mga tawag sa emerhensiya, busa mas dako ang kalainan sa response time kung diretsong itawag ang insidente sa ilang hotline.
Gipasiugda ni Vallejos nga sa panahon sa sunog, matag segundo importante, busa dili na angay hulaton nga mahimong viral ang insidente sa Facebook una pa ipahibalo sa bombero. Mahinumdoman nga bag-o lang adunay sunog sa Upper Zayas, Carmen, Cagayan de Oro City, nga nakapahinabo og kapin usa ka milyon ka pesos nga damage.
Photo courtesy: Bfp-R10 Carmen Fire Station
