Nakahatag og dakong garbo sa Dakbayan sa Lapu-Lapu ang lokal nga chess player nga si Master Marquis Angelo Y. Mallorca human niya makadaog og upat ka medalya sa 24th ASEAN+ Age Group Chess Championship nga gipahigayon sa Singapore niadtong nakalabayng adlaw.
Nasakmit ni Mallorca ang duha ka silver medal human makapahimutang sa Rapid Team ug Rapid ASEAN categories, samtang nakadaog usab siya og duha ka bronze medal sa Standard Team ug Blitz Team categories atol sa kompetisyon.
Nakigsangka ang batang chess player batok sa mga nanguna nga Under-14 players gikan sa nagkalain-laing nasod sa Southeast Asia, diin iyang gipakita ang lig-on nga kahibalo ug abilidad sa pag-atubang sa mga kusgan nga kontra.
Gipakita ni Mallorca ang iyang kamaayo, maampingong pagplano sa matag lihok ug kalmado nga pagdumala sa pressure sa kompetisyon, nga nahimong importante sa iyang malampusong kampanya sa internasyonal nga entablado.
Nagpadayon ang iyang kalampusan isip usa sa mga batan-ong atleta nga nagrepresentar sa dakbayan sa lapulapu sa internasyonal nga kompetisyon, samtang naghatag kini og inspirasyon sa ubang mga kabatan-onan nga interesado sa chess ug sports.
Gipasidunggan sa lokal nga pangagamhanan sa Lapu-Lapu, ubos sa pagpangulo ni Mayor Cindi King-Chan, ang nahimo ni Mallorca ug giila ang iyang upat ka medalya isip dakong kalampusan ug tinubdan sa garbo sa tanang Oponganon.
Naglaum ang dakbayan nga ang maong kalampusan mahimong dugang nga inspirasyon kang Mallorca aron ipadayon ang iyang kamaayo ug paglambo sa chess, ug makab-ot pa ang mas daghang kalampusan sa umaabot nga mga kompetisyon.
Photo courtesy: Lapu-Lapu City Information Office
