Nanawagan ang nagkadaiyang grupo sa Pork producers ngadto sa gobyerno nga ibalik ang mas taas nga taripa o buhis sa imported nga karneng baboy aron matubag ang giingong sobra nga pag-import sa pork products sa nasud.
Lakip sa nanawagan ang Pork Producers Federation of the Philippines Inc., Philippine Pork Council Alliance Inc., ug Agricultural Sector Alliance Party-list (AGAP), nga nag-ingon nga gikinahanglan ang maong lakang aron mapanalipdan ang lokal nga industriya sa pagbuhi og baboy.
Sumala sa datos nga gipresentar sa mga pork producers, misaka ngadto sa 891 milyon ka kilo ang baboy nga misulod sa nasud niadtong 2025, kumpara sa 610 milyon ka kilo niadtong 2023 ug 774 milyon ka kilo niadtong 2024.
Gusto sa mga grupo nga ibalik ang taripa sa imported nga karneng baboy ngadto sa kanhing 30 porsyento alang sa in-quota imports ug 40 porsyento alang sa out-quota imports, gikan sa kasamtangang 15 ug 25 porsyento.
Gihangyo usab nila ang pagpadayon sa pagbakuna sa mga baboy batok sa African Swine Fever (ASF), ingon man ang hingpit nga pagpatuman sa Animal Industry Development and Competitiveness Act.
Lakip usab sa ilang gipangayo ang mas hugot nga pag-monitor ug regulasyon sa pagbaligya sa frozen nga karneng baboy ug uban pang pork products aron masiguro nga luwas ug kalidad ang mga produkto nga mapalit sa mga konsumante.
Giawhag usab sa maong mga grupo katawhang Pilipino nga mas mopili sa lokal nga karneng baboy aron makatabang sa mga lokal nga magbababoy ug mapalig-on ang industriya sa pagbuhi og baboy sa nasud.
Photo courtesy: National Hog Farmer
