Gipahibalo ni Surigao del Sur 1st District Representative Romeo Momo Sr. ang pag-apruba sa Commission on Higher Education (CHED) sa North Eastern Mindanao State University (NEMSU) nga mag-abli o mag offer og College of Medicine, nga iyang gihulagway isip dakong lakang sa pagpalapad sa access sa kalidad nga medical education sa probinsya.
Matud ni Momo, ang maong pag-apruba usa ka milestone tungod kay mas napaduol niini ang tumong nga mahimong mas accessible sa mga Surigaonon ang kalidad nga edukasyon sa medisina. Gipasabot usab sa kongresista nga ang pag-abli sa medical program sa NEMSU makatabang sa paghulma sa bag-ong henerasyon sa mga doktor nga magserbisyo sa Caraga Region.
Sa press release sa CHED niadtong Martes, gipahibalo sa ahensya nga upat ka Higher Education Institutions o HEIs, lakip ang NEMSU, ang gihatagan og permiso nga mag-offer sa Doctor of Medicine program sugod sa Academic Year 2026–2027. Sumala sa CHED, ang maong pag-apruba magpalapad sa oportunidad alang sa mga estudyanteng nangandoy nga mahimong doktor sa nagkalain-laing bahin sa nasud.
Samtang, sumala usab sa NEMSU niadtong Miyerkules, gipailalom ang unibersidad sa evaluation visits sa CHED aron mapamatud-an ang ilang pagsunod sa minimum requirements ubos sa Memorandum Order No. 18, Series of 2016. Gitugotan ang NEMSU nga mag-operate sa first ug second year levels sa ilang Doctor of Medicine program.
Matud sa unibersidad, ang maong pag-apruba nagsuporta sa tumong sa NEMSU ug sa probinsya nga makahimo og mga homegrown doctors ug healthcare professionals nga mahimong moserbisyo sa mga komunidad sa tibuok Surigao del Sur ug sa Caraga Region.
Gidugang sa mga opisyal nga ipahibalo sa dili madugay ang mga detalye kabahin sa admission ug enrollment alang sa Doctor of Medicine program.
SOURCE: PNA; Photo courtesy: CHED
