Gipahimangnoan ang mga negosyante ug mga nagbuhi og baboy sa lungsod sa San Miguel, Surigao del Sur, nga dili magduha-duha sa pagpahibalo sa lokal nga panggamhanan kung adunay ilang mga baboy nga adunay sakit o nag luya kini human mikaylap sa maong lungsod ang African Swine Fever (ASF).
Gipasiugda nga kinahanglan dayon i-report sa mga nagbuhi og baboy ang bisan unsang timailhan sa sakit aron dali kining mapugngan sa pagkaylap ug mahatagan dayon og hustong pagtagad sa mga otoridad.
Matud ni Municipal IPMR/SB Member Datu Rico Maca, dili angay ikaulaw sa mga nagbuhi og baboy ang pagsulti o pagreport kung natapnan ug sakit ilang baboy, tungod kay kini alang sa kaayohan ug kaluwasan sa tibuok komunidad.
Dugang pa ni Maca, isip lakang sa pagpugong sa pagkaylap sa sakit, temporaryong dili tugotan sa lokal nga panggamhanan ang pagsulod o pagdala og mga baboy ug mga karneng baboy ngadto sa lungsod sa San Miguel ug sa ubang bahin sa probinsya.
Gihangyo usab niya ang kooperasyon ug pagsabot sa mga nagbuhi og baboy ug mga negosyante sa maong lakang, tungod kay kay matud pa ang tumong niini mao ang pagpanalipod sa panginabuhian ug kaluwasan sa mga residente, ingon man ang pagpugong sa posibleng pagkaylap sa sakit sa mga baboy.
Photo courtesy: LGU San Miguel
