Gipahigayon sa Tandag City Disaster Risk Reduction and Management Office (CDRRMO) Rescue Team ang site inspection ug operational assessment sa bag-ong natukod nga Emergency Outpost nga nahimutang sa Vicente L. Pimentel, Sr. Boulevard, Tandag City, sulod sa Police Assistance Center.
Ang maong pasilidad magsilbing dugang nga hub alang sa mga rescuer ug emergency responders sa siyudad ug gikatakdang magsugod sa operasyon sa Septyembre 1, 2026.
Tumong sa bag-ong emergency outpost nga mapalig-on ang kapasidad sa siyudad sa pagtubag sa mga emerhensiya, mas mapadali ang koordinasyon tali sa mga responders, ug mas paspas nga ma-deploy ang mga rescue personnel panahon sa mga emerhensiya ug kalamidad.
Pinaagi niini, gilauman nga mas mapaduol ang serbisyo sa mga responders ngadto sa komunidad ug mas mapadali ang paghatag og tabang sa mga residente nga nanginahanglan atol sa mga insidente o kalamidad.
Matud pa nga ang pagtukod sa maong pasilidad kabahin sa padayong paningkamot sa City Government of Tandag, ubos sa pagpangulo ni Mayor Roxanne Pimentel, aron mapalig-on ang disaster preparedness ug maprotektahan ang katawhan batok sa nagkadaiyang hulga ug emerhensiya.
Photo courtesy: Tandag City Disaster Risk Reduction and Management Office
