Padayon ang pag-uswag sa pampublikong transportasyon sa Davao City pinaagi sa Davao Public Transport Modernization Project (DPTMP), nga adunay kinatibuk-ang puhunan nga mokabat sa ₱73 bilyon. Ang proyekto gipangulohan sa Department of Transportation (DOTr), kauban ang City Government of Davao ug suporta gikan sa Asian Development Bank (ADB), ASEAN Infrastructure Fund, Green Climate Fund ug uban pang ahensya sa gobyerno.
Kabahin sa proyekto ang pagtukod og lima ka modernong depot, tulo ka terminal, usa ka driving school, kapin 1,000 ka bus stops, ug mga 1,000 ka diesel ug electric buses.
Sumala pa ipatuman usab ang Intelligent Transport Systems ug automated fare collection aron mahimong mas luwas, kasaligan, hapsay ug mas inklusibo ang pagbiyahe sa mga Dabawenyo.
Gipakita sa 2026 ADB Board Group Visit ang kalamboan sa proyekto ug ang epekto niini sa pampublikong transportasyon sa siyudad.
Matud pa, dili lamang pag-ilis sa mga sakyanan ang tumong sa modernization, kundili ang pagpaayo sa koneksyon sa mga tawo ngadto sa trabaho ug serbisyo, pagpalig-on sa komunidad, ug paghimo sa Davao City nga mas hapsay ug mas komportable puy-an.
Photo Courtesy: City Government of Davao
