Gipadayag sa Japan Credit Rating Agency (JCR) sa A- nga investment-grade credit rating sa Pilipinas, uban sa stable nga outlook, bisan pa sa mga hagit nga giatubang sa ekonomiya sa nasod.
Sumala sa JCR, mitubo ang ekonomiya sa Pilipinas sa 2025 sa pinakahinay nga dagan niini gawas sa panahon sa pandemya. Usa sa mga hinungdan niini mao ang pagkunhod sa public investment tungod sa kontrobersiya nga nalambigit sa mga proyekto sa flood control.
Bisan pa niini, nakita sa JCR nga nagpadayon ang mga imbestigasyon batok sa mga responsable sa maong eskandalo. Aduna na usab, matod sa ahensya, mga indibidwal nga gisuhan o gi-indict isip kabahin sa paningkamot nga mapanubag ang mga nalambigit.
Gilauman sa JCR nga mosugod pagbangon ang real GDP growth sa ikaduhang bahin sa 2026. Para sa tibuok tuig, giprodyek niini ang pagtubo sa ekonomiya sa mid-3 percent range, nga gilauman nga suportahan sa pagbalik sa public infrastructure spending ug sa epekto sa mga polisiya alang sa pagpugong ug pag-stabilize sa presyo.
Misulti usab ang JCR nga miayo ang current account deficit sa Pilipinas. Gikan kini sa 4% sa GDP niadtong 2024 ngadto sa 3.3% niadtong 2025. Nalambigit sa maong pag-uswag ang pagtaas sa exports sa electronic products, padayon nga remittances gikan sa mga overseas Filipino workers, kita gikan sa business process outsourcing, turismo, ug net inflows sa foreign direct investments.
Sa laing bahin, nagpabiling lig-on ang foreign exchange reserves sa nasod, nga miabot sa $110.8 bilyon.
Bisan adunay mga problema sa public spending ug governance, nagpakita ang pagpadayon sa A- rating nga adunay pagsalig ang JCR sa kapasidad sa Pilipinas sa pagdumala sa ekonomiya ug pagtuman sa mga obligasyon niini sa utang.
Photo Courtesy: PNA
