Dili diay purong kloro o chlorine ang hinungdan nganong mamula ug mangatol ang mata human maligo sa swimming pool. Sumala sa impormasyon, ang chloramines nga maporma kung ang chlorine mosagol sa ihi, singot, ug uban pang hugaw sa tubig maoy kasagarang makairita sa mata.
Mas daghan ang ihi ug organikong hugaw sa pool, mas daghan usab ang chloramines nga maporma, nga mahimong hinungdan sa pagpula ug pagsakit sa mata.
Ang gitawag nga “chlorine smell” sa swimming pool kasagaran dili gikan sa chlorine mismo, kundili sa chloramines nga resulta sa reaksiyon sa chlorine ug mga organikong materyales.
Gipahinumdoman ang mga manlalangoy nga maligo una sa dili pa mosulod sa pool, mogamit sa kasilyas kung kinahanglan, ug likayan gyud ang pagpangihi sa swimming pool aron mapadayon ang kalimpyo ug kahimsog sa tanan.
Photo Courtesy: PNA
