Nakabaton sang pipila ka pagkilala ang Public Employment Service Office ukon PESO Tacurong City bangod sang ila mabaskog nga performance sa pagpatuman sang mga programa para sa trabaho.
Ginhatag ang mga award sa 3rd PESO MASK Meeting 2026, nga ginhiwat sang Agosto 25 tubtob 26 sa Municipal Hall sang Palimbang, Sultan Kudarat.
Gintambungan ini sang mga PESO managers kag representante sang nagkalain-lain nga local government units sa probinsya para pagahisgutan ang mga programa, pagpaayo sang employment services, kag pagpasidungog sa mga nangin talulupangdon sa pagpatuman sang mga programa sang Department of Labor and Employment ukon DOLE.
Bugal nga gindala naman ang Tacurong City ni PESO Manager Allan S. Freno kag Labor and Employment Assistant Ervin Jay M. Balanueco.
Sa awarding ceremony, ginpasidunggan ang PESO Tacurong bangod sang ila performance sa una kag ikaduha nga quarter sang 2026, lakip ang Referral Rate, Placement Rate, Job Search Assistance, kag Labor Market Information Delivery.
Nagpakita sang pagkilala ang padayon nga panikasog sang PESO Tacurong sa paghatag sang mas maayo nga serbisyo kag oportunidad sa trabaho para sa mga residente.
Photo Courtesy: City Government of Tacurong
