Gisugyot sa administrasyong Marcos ang kinatibuk-ang P643.95 bilyon nga national budget alang sa Department of Public Works and Highways (DPWH) para sa tuig 2027. Mas taas kini og 21.29 porsyento, o mokabat sa P113.05 bilyon, kumpara sa P530.90 bilyon nga pondo sa ahensya karong 2026.
Sumala sa Department of Budget and Management (DBM), dakong bahin sa dugang nga alokasyon igahin alang sa mga nagpadayon nga Infrastructure Flagship Projects nga gipondohan sa lokal ug langyaw nga mga institusyon. Lakip sa mga dagkong proyekto nga makabenepisyo sa maong pondo ang Laguna Lakeshore Road Network, Bataan-Cavite Interlink Bridge, Davao City Bypass, Cebu-Mactan Bridge and Coastal Road, ug ang Pasig-Marikina River Channel Improvement Project Phase IV.
Gilauman nga ang dugang nga paggasto alang sa mga imprastraktura makatabang sa pagmugna og dugang nga trabaho, pagpakunhod sa pamasahe ug gasto sa pagbiyahe, ug pagpalig-on sa koneksyon tali sa nagkadaiyang rehiyon sa nasud.
Photo courtesy: DPWH
