Nagpabilin sa 87 porsyento ang rice production efficiency sa Northern Mindanao, diin usa sa mga nag-unang hinungdan ang kakulang sa lugar nga mahimong tamnan og humay. Sumala sa Department of Agriculture Region 10, wala pa makab-ot sa rehiyon ang 100 porsyentong production efficiency tungod sa limitado nga agricultural areas alang sa produksyon sa palay.
Matud ni DA-10 Regional Director Jose Apollo Pacamalan, paningkamotan sa ilang buhatan nga mapataas ngadto sa 90 porsyento ang rice production efficiency sa rehiyon sa sunod tuig. Hinuon, gipasalig ni Pacamalan nga dili pa kini angay kabalak-an tungod kay ang pag-import og bugas makatabang sa pagdugang sa suplay sa rehiyon.
Dugang pa niya, daghan usab og alternatibong pagkaon nga mahimong maprodyus sa Northern Mindanao, sama sa mga utanon ug uban pang agricultural products. Giawhag usab sa DA-10 ang publiko nga likayan ang pag-usik-usik sa pagkaon isip kabahin sa paningkamot sa pagseguro sa food supplies sa rehiyon.
Photo courtesy: Department of Agriculture – Regional Crop Protection Center 10
