Landig sa balay tambalanan particular sa Butuan Medical Center o BMC ang lalaki human kining makuryente sa ibabaw nga bahin sa usa ka government bank sa Dakbayan sa Butuan, alas 6:00 kapin kagabii.
Sumala sa mga nakasaksi, kalit lang matud pa adunay kusog nga pagbuto gikan sa transformer sa kuryente nga misangpot sa pagkapalong sa suga sa ilang establisemento.
Tungod sa kusog nga pagbuto, daling gisusi sa duty security guard ang maong lugar ug didto nasuta nga adunay usa ka lalaki nga ning kirig samtang nawadan na og panimuot dihang nakuryentehan.
Nasuta usab sa ibabaw sa establisemento ang pipila ka pinutol nga mga kable sa kuryente, nga padayon pang giimbestigahan aron matino ang hinungdan sa insidente.
Sa pagkakaron, naka lingkawas na sa hulga sa kamatayon ang maong lalaki, samtang padayon pang nag paalim sa naasoyng balay tambalanan, samtang giila pa sa awtoridad ang iyang identidad.
