Gilantaw karon sa Provincial Government sa Dinagat Islands ang posibilidad nga gamiton ang tubig-dagat isip dugang nga tinubdan sa limpyo ug luwas nga tubig nga mainom, samtang nagpadayon ang grabeng kakulang sa suplay sa tubig sa probinsya tungod sa hulaw ug epekto sa El Niño.
Matod ni Governor Nilo P. Demerey Jr., mahimo’g gamiton ang tulo ka Reverse Osmosis Machines nga kaniadto nang napalit sa probinsya aron maproseso ang tubig dagat ug matangtang ang asin ug uban pang hugaw niini.
Taliwala pa niini, gikinahanglan gihapon ang tukmang pagproseso ug water treatment aron maseguro nga ang tubig mahimong luwas alang sa pagkonsumo sa katawhan.
Gitan-aw usab sa probinsyal nga kagamhanan ang posibilidad sa pagpangita og tubig ilalom sa yuta pinaagi sa pag-drill sa mga lugar nga adunay potensyal nga tinubdan, nga mahimong suportahan sa solar-powered pumps.
Gidugang nga wala pa masulbad ang kakulang sa suplay, magpadayon ang water rationing sa mga lugar nga labing grabeng naapektuhan.
Gipasiugda usab ni Gov. Demerey nga ang pagdeklara sa State of Calamity makahatag og mas sayong higayon sa mga lokal nga kagamhanan sa paggamit sa ilang Quick Response Funds aron matubag ang dinaliang panginahanglan sa mga residente.
Giawhag usab ang tanang Dinagatnon nga magmatinud-anon sa pagtipid sa tubig ug unahon kini alang sa pag-inom, pagluto, personal nga kahinlo ug uban pang mahinungdanong panginahanglan.
Samtang gipangita ang malungtarong solusyon, gikinahanglan ang panaghiusa ug kooperasyon sa tanan aron mapreserbar ang matag tulo sa tubig sa panahon sa krisis.
