Nagviral sa social media ang usa ka babayeng factory worker sa Shenzhen, China, human migawas ang iyang mga litrato sa usa ka bag-ong iPhone nga gipalit sa usa ka kustomer sa United Kingdom.
Makita sa mga litrato ang maong trabahante nga nagsul-ob pa og uniporme ug guwantes samtang anaa sa trabahoan ug nagpahiyom. Sumala sa report, nadiskubrehan sa kustomer ang mga hulagway sa maong babaye sa dihang iyang gi-ablihan ang IPhone aron unta nga ikonek sa iTunes.
Human niini, gipaambit sa kustomer ang mga litrato sa maong factory worker ngadto sa online ug dali kining mikatag sa social media nga nahimong sentro sa diskusyon.
Sa ulahi, nasayran nga ang babaye nagtrabaho sa Foxconn, usa ka kompanyang nalambigit sa paghimo sa mga produkto alang sa Apple, diin gikataho posibleng nakuha ang mga litrato atol sa proseso sa pagtesting sa mga iPhone ug posible usab nga nalimtan kini sa pagdelete sa wala pa kini gibaligya.
Photo Courtesy: NBC News
