Posibleng maharap sa suspensiyon ang 40 ka power plants tungod sa giingong kakulang sa aksiyon taliwala sa padayong nipis nga suplay sa kuryente sa Visayas, sumala kang Energy Secretary Sharon Garin. Wala pa ginganlan sa kalihim ang mga operator nga posibleng masuspinde, apan lakip sa listahan ang pipila ka gagmay nga diesel power plants.
Una nang nag-isyu ang Department of Energy (DOE) og 203 ka show-cause orders niadtong Hulyo batok sa mga power generation companies sa tibuok nasud tungod sa ilang kapakyasan sa pagsumite sa mandatory self-assessment report. Tumong niini nga mamonitor ang kapasidad sa mga planta sa husto nga operasyon ug mahibal-an ang mga insidente sa outages. Matud ni Garin, nakadawat na og warning ang mga kompanya ug anaa na sa proseso ang rekomendasyon alang sa suspensiyon nga ipadala ngadto sa Energy Regulatory Commission (ERC).
Dugay nang giatubang sa Visayas ang problema sa kakulang sa suplay sa kuryente, diin kanunay kini maabot sa yellow alert ug usahay mosaka sa red alert kung dili na igo ang available nga suplay aron matubag ang panginahanglan sa rehiyon. Tungod niini, gihatagan og gibug-aton ang panginahanglan sa mas hugot nga pagmonitor ug pagpatuman sa mga lakang aron malikayan ang mas grabe nga power shortage.
Photo Courtesy: Think GeoEnergy
