Gipamatud-an sa usa ka 82-anyos nga fitness enthusiast nga dili babag ang edad sa pagpadayon sa aktibong panglawas ug pagbuak og mga rekord sa Guinness World Records.
Si Annie Judis, nga nailhan kaniadto isip Jean Bell, padayon nga nag-ehersisyo ug nag-atiman sa iyang panglawas tungod sa iyang pagtuo nga importante ang pagpabiling aktibo. Human sa iyang karera isip modelo ug aktres, mas gipili niya nga hatagan og prayoridad ang fitness ug wellness.
Karon, gipaambit ni Annie sa iyang dul-an 200,000 ka followers sa Instagram ang iyang mga workout ug mga pagsulay sa pagbuntog sa mga rekord.
Sa iyang record-breaking journey, nakahupot na siya og 14 ka Guinness World Records titles, lakip ang rekord isip pinakatinigulang nga babayeng competitive rope skipper. Nakuha niya ang iyang unang Guinness World Record sa edad nga 75 anyos ug 92 ka adlaw. Karong tuiga, misalmot usab siya sa Prickly Pear Open 2026 sa Tucson, Arizona, alang sa pagsulay nga mabawi ang iyang titulo.
Matod ni Annie, dili siya mihunong sa pagdamgo ug padayon niyang gisulayan ang iyang kaugalingong mga limitasyon. Giawhag usab niya ang mga tawo nga magpabiling aktibo ug mag-atiman sa ilang panglawas bisan unsa pa ang ilang edad.
Photo Courtesy: Infobae
